Республикын промышленность министрже паша дене Нефтьым перерабатыватлыше заводыш миен
Республикын промышленность, экономически вияҥмаш да торговля министрже Станислав Крылов паша дене Нефтьым перерабатыватлыше заводыш миен. Республикыште тиде ик кугу предприятийлан шотлалтеш. Тушто 600 утла еҥ пашам ышта. Завод тӱҥ шотышто нефтьым перерабатыватла да эл кӧргӧ ден ӧрдыж рынкылаште ужала. Тудо бензиным, дизель топливым, авиацийлан кросиным, суднылан мазутым, гудроным да моло продукцийым ыштен луктеш, регионышто налогым тӱлышӧ ик кугу предприятийлан шотлалтеш. Кӱрылтде пашам ыштыше завод коронавирус инфекций шарлыме жапыште чыла сомылым Роспотребнадзорын йодмашыже почеш шуктен. Сандене ончыч ыштыме кылым арален коден да сатум колтымо кугытым иземден огыл. «Марий НПЗ-ын» генеральный директоржо Андрей Сербский дене министрын пашаче вашлиймаштышт производство куатым ончен лекме да предприятийын ончыкылык пашаже да вияҥме йодышыжым каҥашыме. Тудо производство кугытым арален коден. Ончыкыжым продукцийын ассортиментшым кугемдаш да производствым уэмдаш шона.