Йошкар-Олаште у магистраль график почеш чоҥалтеш

Йошкар-Олаште у магистраль график почеш чоҥалтеш. Марий Элым вуйлатыше Александр Евстифеев, сӧрымыж семынак,  уэш Киров ден Строитель- влак уремым ушышо магистраль уремым чоҥымашке миен. Арня ончыч тергымыж годым график деч вараш кодмашым палемден. Сандене палемдыме планым поктен шуаш кӱштен ыле. «Марийскавтодор» акционер ушемын генеральный директоржо Евгений Козырев каласен: писештына, сентябрь мучаш марте чыла кӱлеш наре ошмам кондымо лиеш. Техникымат ешарыме. Нылымше опорышто чыла свайым кырыме, визымшыште вашке кырен пытарена. Тиде пашам «Мостремстройлан» пуымо. Тудо почеш кодмым пытараш полша. Кодшо гана ме лач тидын нергенак ойленна ыле,- каласен республикым вуйлатыше. Тыгак тудо проект да смете документацийын ямде улмыж шотышто йодын. Документ укелык процент шотышто тергымашым эртараш чаракым ышта. Россий правительстве председательын алмаштышыже Марат Хуснуллинын эртарыме совещанийыште оксам кучылтмо да пашадарым жапыштыже тӱлымӧ нерген келгын мутланыме. Застройщикын техникылан тӱлаш, материалым налаш, пашадарым да налогым тӱлаш эре оксаже лийшаш. Сандене качествым да чоҥымо жапым пудырташ ок лий, Кушто подрядчик кӱлеш гын, нуным лӱдде ӱжаш лиеш, - каласен республикым вуйлатыше. Магистраль уремым чоҥен шукташ ныл ийым пуымо.