Йошкар-Олаште у канализаций насос станцийым чоҥаш тӱҥалыт
Йошкар-Олаште у канализаций насос станцийым чоҥаш тӱҥалыт, кызытсыже шолдырген пытен, - увертара Йошкар-Ола администраций. Мэрий умылтара: Петров урем ден Ленин проспект ушнымаште верланыше канализаций насос станцийым 1981-ше ийыште чоҥымо. Кызыт марте тусо оборудований тоштемын. Сандене кодшо идалык мучашыште подрядчик дене ойпидышым кылдыме. Тудо кок ий жапыште у станцийым чоҥышаш. Станций тошто верыштак лийшаш. Тудын куатше кугурак да эн у оборудованийже лийшаш.