Судья- влак пашаштым иктешленыт

              Марий Элыште тӱшка юрисдикций суд- влакын 2021-ше ийысе пашаштым иктешлыме. Совещаний Конгресс- влак полатыште эртен. Марий Элым вуйлатышын лӱмжӧ дене судья- влакым министр, республикым вуйлатышын полномочный представительже Николай Коротков саламлен. Тудо суд- влакын сай паша лектышыштым палемден да пытартыш вич ийыште правительствын ыштыме пашаже дене палдарен. Республикысе бюджетын парымже шагалем толеш. Кызыт тудын кугытшо 10 миллиардат 500 миллион теҥге кодын. 2017-ше ий дене таҥастарымаште кугыжаныш парымым кум миллиард теҥгелан иземдыме. Пандемийлан кӧра ятыр роскот лийын гынат, республикым вуйлатышын порученийже- влак шукталт толыт. Николай Коротков тыгак  мировой судья да аппаратын сотрудникше- влакын паша верыштым, пӧлемыштым тӱзатыме йодышеш шогалын. Тиде йодышым республикым вуйлатыше шке контрольыштыжо куча да тӱткыш ойыралташ тӱҥалеш, манын.
                Республикысе Верховный судын председательже Артём Грачёв палемден: 2021-ше ийыште суд- влак чарымашым пуртымо жапыште пашам умбакыже шуеныт, тӱткышым судья- влакын, суд аппаратын пашаеҥже да толшо- влакын  тазалыкыштым аралыме йодышлан ойырымо. 2021-ше ийын ончымо паша эн шуко лийын. Чылаже 194 тӱжем паша ден материалым ончен лекме. Тидыже ончычсо ийла деч ятырлан шукырак. Пашам сай качестве дене да жапыштыже шуктымо. Совещаний мучашлан ойыртемалтше суд пашаеҥ- влаклан сулен налме наградым кучыктымо.
                 Фото: Марий Элым вуйлатышын организаций да аналитик виктемже.