Сенатор Сергей Мартынов Шернурысо Александр Конаков лӱмеш тоштер- ончер комплексыш миен

            Федераций Советыште Марий Эл деч представитель, сенатор Сергей Мартынов республикыш паша дене толмыжо кышкарыште Шернурысо Александр Конаков лӱмеш тоштер- ончер комплексыш миен. Тиде- Шернур велысе ик эн кугу тоштер. Кызыт тушто вигак ныл выставке пашам ышта. Сенатор дене пырля районыш Кугыжаныш Погынын депутатше Владимир Кожанов миен. Нунылан тоштер пашаеҥ- влак залла мучко экскурсийым эртареныт. Сергей Мартынов палемден: марий калыкын шӱм-чон да материальный тӱвыражын кумдыкшым ончыктышо кызытсе наукын поян базыже уло. Йылмызе, историк, археолог, этнограф, фольклорист, тоштер пашаеҥ- влакын тыршымышт дене шергакан тӱвыра да историй поянлыкым арален кодымо. Вашлиймаш годым Сергей Мартынов тоштерын директоржо Татьяна Гусевалан «Марий- влак» ойыртемалтше книгам пӧлеклен. Тиде 2005-ше ийыште лукмо тӱшка монографийым ешарен, пойдарен уэш савыктыме книга.
            Фото: "Марийская правда".