Купеч Карелинын пӧртшым уэмдат

              Йошкар-Олаште Карелин купечын пӧртшылан леведышым ыштат. Тушто пужен ыштыме пашам тӱҥалме. Воскресенский сер, 40-ше пӧрт адрес дене верланыше пӧрт республике кӱкшытан тӱвыра поянлык объектлан шотлалтеш. Кок пачашан кермыч пӧртым 19-ше курымышто 1840-ше ийыште чоҥымо. Тудым олмыкташ проект документацийын экспертизыжым 2021-ше ийын июльышто пеҥгыдемдыме. Кодшо ийынак аварий ынже лий манын пашам шуктымо. А тений план почеш реставраций сомыл тӱҥалын. Кызыт подряд организаций леведышым ышта, стропилам вераҥда. Ушештарена: 2012-шо ийын июльышто пӧртыштӧ пожар лийын. Вара тудын чыла окна ден омсажым петырыме. 2018-ше ийын пӧртым пеш чот начарлан шотлымо. 2019-ше ийыште Йошкар- Олаште инспекций дене коштмыжо годым Карелинын пӧртшым Марий Элым вуйлатыше контрольыш налын.
         Фото: МариМедиа.