Федерал корнын 20 меҥге кужытшо ныл полосан лиеш

             Республике гоч шуйнышо федерал корнын 20 меҥге кужытшым ныл полосаным ыштат. «Волго-Вятскуправтодор» виктемын пресс-службыжын увертарымыже почеш, тыгай вашталтыш «Вятка» да «Волга» трассын «Йошкар-Ола- Зеленодольск» корно ужашыштыже лийшаш. Кумдаҥдыме пашам тений шыжым мучашлаш палемдыме. Капитально олмыктымо проект почеш, Звенигово да Волжский районла гоч эртыше корнын 67-ше гыч 75-ше меҥгыже марте ужашыште корным кумдаҥдаш палемдыме. Корнышто кошташ лӱдыкшыдымылыкым ышташ манын, кандаш меҥгат пеле кужытышто оцинковатлыме барьерым ыштат, меҥгат пеле кужытышто волгыдым пуртат, разметкым ыштат. Илеть ден Кичиер посёлкыла воктене чарналтыш площадкым олмыктат, нунын деке намийыше тротураым уэмдат. «Вятка» корнын 31-ше гыч 40-ше меҥге марте кужытышто тыгак ныл полоса марте корным кумдаҥдат. Кокшамарий ял воктене кок чарналтышым олмыктен тӧрлат, тротуарым уэмдат да корно гоч вончемым ыштат.