Волжск олаште Геройын Партше уло

            Волжск оласе кокымшо номеран кыдалаш школышто Геройын Партшым ыштыме. Элым аралышын кечыже кышкарыште Российын Геройжо Валерий Иванов лӱмеш оласе кокымшо школышто патриот акций эртен. Нылымше кабинет, сылнымут пӧлем. Тыште кумшо радамысе пытартыш парт коклаште Валерий Иванов шинчен. Срочный службын рядовойжо 19 ияш Валерий Ивановым Йӱдвел Кавказыш службо командировкыш колтеныт. 1995-ше ийын 18-ше майыште кокымшо гаубичный дивизион боевой задачым шуктымашке ушнен. 19-ше майыште артиллерий дивизийысе самоходный гаубица тушман ваштареш чот шоген. Боевой отделенийыште тул пижын. Валерий Иванов орудийын командирже дене пырля тул ваштареш пижыныт. Чот когаргымеке орудийын командирже отделений гыч лектын, но рядовой Иванов техникым умбакыже утараш тыршен, но пудешталтын. Тудын тыршымыжлан кӧра калыкым да техникым боевой позиций гыч лукташ  жапым ситарыме. Ивановым ача-аважын шочмо Волжский районысо Олыкъялыште тойымо. Патырлыкым ончыктымыжлан Валерий Ивановлан Марий Эл гыч эн ончыч Российын Геройжо званийым пуымо. Тидын нерген тунемше- влаклан Россий Геройын класс вуйлатышыже, просвещенийын отличникше Лидия Черникова каласкален. Ынде тиде партыште Российын Геройжо лӱмеш табличкым вераҥдыме.
               Фото: Волжск оласе кокымшо кыдалаш школ.