Илыме верым чоҥаш 51 мланде участкым келшышылан шотлымо
Республикыштына илыме верым чоҥаш 51 мланде участкым келшышылан шотлымо. «Илыме вер да оласе кумдык» калыкле проектым шыҥдарыме кышкарыште Росреестр кундемласе кучем орган- влак дене пырля илыме верым чоҥышаш кумдыклам пайдалын кучылтмашым шымла. Марий Элыште тидын шотышто оперативный штаб пашам ышта. Тудо кажне мланде участке шотышто кучылташ лийме але лийдыме нерген решенийым луктеш. Тиддеч вара чоҥаш йӧрышӧ мланде кумдык нерген увер публичный кадастр картыш пурталтеш. Росреестр виктемым вуйлатышын сомылжым шуктышо Вячеслав Волков палемден: тачысе кечылан оперативный штаб 177 гектар кумдыкан 51 мланде участкым рашемден. Нуно Йошкар-Ола, Козьмодемьянск, Медведево, Волжский, Марий Турек, Курык марий да Звенигово районлаште верланеныт. Тиддеч посна куд участкым шке погышко але арендыш налме. Нунын кокла гыч кумытшо шуко пачеран пӧртым чоҥаш, кумышто посна пӧртым чоҥаш йӧрышылан шотлалтын. Инвестор- влаклан нине участке нерген пален налаш Публичный кадастр карте сайтыш пураш кӱлеш.