Марий Эл гычын служитлыше да кычалше пий Тӱнямбал премийын призёржо лийын

             Марий Эл гычын служитлыше да кычалше пий Тӱнямбал премийын призёржо лийын. Республикысе МВД-н кинолог службыштыжо шуаралтше Портекомаро лӱман служитлыше немыч овчарке «Мыйын эпле да кӱлешан янлыкем» Икымше Тӱнямбал премийын «Калык геройжо- влак» номинацийыштыже сеҥышыш лектын. Калыкын кумылжым савырымылан приз верч виш интернет таҥасымашыште тиде пий шым тӱжем утла йӱкым поген. Айдемын илышыжым утараш полшышо служитлыше пий нерген пӱтынь элна кодшо ийын ноябрьыште пален налын. Кинолог службо рӱдерын пашаеҥже Алексей Порфирьев шке полышкалышыже «Комар» дене чоҥымо объект гыч электроӱзгар- влакым шолыштмо нерген уверым тергаш каен. Полицейский объект воктелсе кундемымат терген лекташ да кышым кычалаш шонен пыштен. Но пий озажым кушкын шогалше шудан корем деке шупшын наҥгаен. Шудо коклаште кийыше пӧръеҥым муыныт. Тудыжо илыше улмаш. Вашке полышым ӱжыктеныт, йолташыже криминалист Эдуард Лапкасовым ӱжыктен, икымше полышым пуаш тӱҥалыныт. Пӧръеҥ ылыжын. Медведево посёлкышто ила, корем деке эрдене лектын, трук йӧсӧ лийын, йолжо коштмым чарнен, вара нимат ок шарне. Тыге икмыняр шагат кылме мландыште киен. Пийлан кӧра полыш вашке толын. Премийым ямдылыше- влакын мутышт почеш лауреат- влаклан наградым кучыктымаш Калининград областьысе Зеленоград олаште 12-шо мартыште лийшаш.
               Фото: Марий Эл МВД-н пресс-службыжо.