Йошкар-Олаште эше ик у йоча сад почылтын

                    Александр Евстифеев Йошкар-Олаште эше ик йоча садым почын. Пытартыш кум ий жапыште почмо тиде шымше йоча тӧнеж. «Шокшо кидкопа» йоча садым 320 верлан «Кугу Сеҥымашын 70 ияш лӱмгечыже» уремыште чоҥымо. Олан тиде ужашыже кызыт чолган чоҥалтеш. Тушто изи йочан шуко еш ила. Сандене тудын почылтмыжым чытен-чытыде вученыт. Тӧнежым чоҥаш 206 миллион теҥгем кучылтмо. У садыште йоча- влаклан илаш да нуным шуараш мо кӱлешыже чыла уло: видеоэскерымаш, тул пижме лӱдыкшӧ ваштареш система, изи капкаште электрон сура, мотор да йӧнан мебель, у оборудований, интерактивный доска, интернет да молат. Александр Евстифеев ден Евгений Маслов йошкар тасмам пӱчкын, садик кӧргым да йоча- влакын тӱжвалне  модмо верыштым онченыт. Регионым вуйлатыше ача-ава да садын пашаеҥже- влакым пашам мучашлыме дене саламден да лишыл кечылаште 9-ше В микрорайонышто эше ик тӧнеж почылтеш манын. Моло микрорайоныштат йоча садым чоҥаш ямдылат.
                  Тиддеч вара Александр Евстифеев Семёновка селаш миен. Туштат йоча да тунемме тӧнежын кӱлешлыкше кугу. Чоҥашлан икмыняр вер темлалтеш. Вуйлатыше лу тӱжем квадрат метр кумдыкан верым ончен. Тушто 825 верлан школым да 320 верлан йоча садым чоҥаш лиеш. Но решенийым лукташлан мыняррак йоча лийшашым шотыш налаш кӱлеш, манын палемдыме. Туныктыш министерстве деч заключенийым налмеке, иктешлыше решенийым ыштена ,- каласен Александр Евстифеев.