Марий Элым вуйлатыше Йошкар-Оласе аэропортын у терминалжын проектше дене палыме лийын

                   Марий Элым вуйлатыше Йошкар-Оласе аэропортын у терминалжын проектшым ончен лектын. Александр Евстифеев аэропортын пассажир терминалжым проектироватлыме да чоҥымо йодыш дене совещанийым эртарен. Аэровокзалым республикым социал- экономик вияҥдыме индивидуал программе почеш чоҥаш палемдыме. Транспорт министр Александр Герасименко республикым вуйлатышылан увертарен: проект да смета документацийым ямдылаш конкурсын лектышыже почеш сеҥышалын юж тарнспортын «Ленаэропроект» проектно- изыскательский да научно-шымлыше институтшым шотлымо. 24-ше ноябрьыште транспорт министерстве дене институт коклаште палемдыме пашам шукташ контрактым ыштыме. Тудын акше 59 миллион теҥге. Контрактын икымше ужашыже 14-ше декабрьлан ямде лийшаш, кокымшыжо- 30-шо апрельлан.
                     Совещаний жапыште Александр Евстифеев ончыкылык зданийын презентацийжым ончен.  Ончыл могыржым икмыняр тӱрлым ямдылыме. Институтын тӱҥ инженерже Константин Тулуповын мутшо почеш, аэровокзал комплекс 400 пассажирлан келыштаралтын. Тушто чоҥештен толшо да чоҥештен  кайышаш- влаклан посна зона- влакым ыштыме лиеш, пурымо верыште контроль ышталтеш, тӱшка зона- туштыжо кевыт, кафе, ава ден йочалан пӧлем, здравпункт, санузел да моло пӧлем- влак лийыт, вучымо пӧлем да чоҥештен кӱзымӧ полосашке лекме вер. Чоҥештен толшо- влаклан багажым пуэдыме вер лийшаш. Александр Евстифеев ушештарен: проектым Росавиаций пеҥгыдемдышаш, моло решенийымат тудын дене кутырен келыштарыман. Тидымат палемдыме: ончыкыжым тӱнямбал рейсым ышташ да чартерный перевозкылан аэровокзалым вияҥдаш лиеш.