Йошкар-Олаште 2023-шо ий марте аварийныйлан шотлалтше 63 пӧртым кораҥдат

                   Йошкар-Олаште 2023-шо ий марте аварийныйлан шотлалтше 63 пӧртым кораҥдат. Йошкар-Олан мэрже Евгений Масловын мутшо почеш 2023-шо ий мучаш марте рӱдӧ олаште 63 тошто пӧртым кораҥдыме да тӱжемат 700 еҥым кусарыме лиеш. Журналист- влак дене вашлиймаште мэр палемден: лишыл кок ий жапыште шӱкшӧ пӧртлаште илыше- влак у пачеран лийыт. Кызыт план почеш 17 пӧртым кораҥдышаш улына. Ятырыштыже кызыт иктат ок иле. Январь- февральыште вич пӧртым рончаш тӱҥалыт. Тидымат ешарен: рончымо деч ончыч оза- влаклан куснаш жапым пуат, вара газым, вӱдым, электроэнергийым чарат, пӧртым рончат да ярсыше участкым тӱзландарышаш программыш пуртат.