Самырык шахматист Европын Чемпионжо лийын

              Латкум ияш марте рвезе- влак коклаште писе шахмат дене Максим Волков Европын Чемпионжо лийын. Чемпионатым Европысо шахмат ушем ямдылен. Самырык шахматист тушто онлайн йӧн дене таҥасен. Максим чырык финалыште Грузий гыч, пелфиналыште Кипр гыч рвезым сеҥен. А финалыште Россий гыч Марк Неронов дене вашлийын да ончыко лектын. Максим ынде шахмат дене Юл кундем округын 20-шо Первенствыштыже модаш Самара Областьыш кая. Тушто таҥасымаш 15-ше гыч 20-шо декабрь марте эрта.