Келшымаш пӧртышкӧ шокшо ден энергийым пуртат

                 Йошкар-Оласе икымше номеран ТЭЦ Калык- влакын келшымаш пӧртышкышт шокшо ден энергийым пурта. Российысе кундемлаште ятыр вере Келшымаш Пӧрт- влакым ыштат. Йошкар-Олаште тудым чоҥаш Российын Правительствыжын полшымыжо да оксам ойырымажлан кӧра лийын кертын. Оксам лач тиде объектлан ойырымо, моло пашалан кучылташ ок лий. Ондак Марий Элым вуйлатыше палемден ыле: республикыштына калык да конфессий коклаште келшымаш кыл вияҥын. Сандене Калык- влакын келшымаш пӧртыштым чоҥымаш тымартеат каҥашалтын да кызыт ончыко лектын. Тидын шотышто элын премьер-министрже посна решенийым луктын. Шуко калык илыман республикылан Келшымаш пӧрт путырак кӱлешан. Зданий шуко функциян лийшаш: офис пӧлем- влак, концерт, куштымаш, репетиций зал- влак, конференц-зал, холл-фойе вераҥдалтыт. Туштак костюм ден реквизитым, сем ӱзгарлам аралыме пӧлем лийшаш улыт. Марий Элым вуйлатыше паша куатым иземдаш огыл, теле гоч чоҥымо пашам шукташ кӱштен. Тунам пашам 2023-шо ийыште огыл, а 2022-шо ийыште мучашлаш лиеш. Кызыт икымше номеран ТЭЦ тушко шокшым да электроэнергийым пурта. 99 метр кужытан 159 миллиметран шокшо сетьым да 235 метр кужытан кабель линийым шупшеш. Объектым инженер коммуникаций деке ушымылан кӧра, чоҥышо бригаде- влак отделке пашам вашкерак тӱҥал кертыт. Тыге ыштышаш паша шагалемеш да чоҥымо  паша вашкерак мучашлалтеш.
                Ола администрацийын фотожо.