Догазификаций программе умбакыже шыҥдаралтеш

                 Догазификаций программе почеш, 180 пӧртыш газ толын. «Газпром газораспределение Йошкар-Ола» догазификаций программе почеш 220 сурт марте газ пучым пыштен. Нунын кокла гыч 180 пӧртшым системе деке ушымо. Газораспределений системе деке ушымаш пӧрт кӧргысӧ сетьын да газ оборудованийын ямде лиймыж деч вара  шукталтеш. Республикыштына догазификаций программыш ныл тӱжем утла сурт пура. Кум тӱжемат 800 сурт озаже газым пурташ йодмашым возен, нуным мланде участке чек марте пучым чоҥаш план-графикыш пуртымо. Нуно тӱҥ йодмашлан келшен толыт- пӧрт да мланде участкылан, газым шке да сурт кӧргӧ кӱлешлыклан кучылташ правашт уло, ялыште газ пучым шупшмо. Догазификацийлан йодмашым умбакыже налыт. Тудым ола ден районлаште  газ компанийлан клиент рӱдерыштышт, мобильный офислаште, «Мыйын документем- влак» шуко функциян рӱдерлаште, кугыжаныш полыш порталыште пуаш лиеш.