Таче- Марий Тиште кече

               Таче- Марий Тиште кече. Марий Элым вуйлатыше Александр Евстифеев республикысе калыкым тиде пайрем дене саламла. Марий йылме республикысе шанче, тӱвыра, мер-политик илышыште чолган кучылталтеш. Марий Эллан 100 ий темме кышкарыште йылме да тӱвыра аланыште икмыняр кӱлешан проектым илышыш шыҥдарыме: электрон версиян рушла-марла мутер, марий йылмын таҥастарымаш мутерже, марла да рушла фразеологий мутер савыкталтын, кызыт марий йылмын эпитет мутерже дене паша шукталтеш. Правительствын полшымыжо дене социал кӱлешан сылнымут, газет дене журнал, увер материал, норматив да правовой акт- влак савыкталтыт. Тӱшка тӱвыра мероприятий- влакым эртарыме годым кугыжаныш йылме- влак иктӧр кучылталтыт. Пытартыш жапыште марий йылмым вияҥдыме шотышто шумо сеҥымаш- влак шанче-йылмызе, шочмо йылмым туныктышо, компьютер технологийын специалистше, писатель, поэт, журналист да мер пашаеҥ- влакын вийыштым иквереш ушен, пырля пашам ыштымыштын лектышыже улыт. Чылалан у усталык да шанче кӱкшытыш шуаш тыланем,- ойлалтеш республикым вуйлатышын саламлымашыштыже.