Эмлыме верлаште койко- влак шагалемыт
Республикыштына коронавирус инфекцийын эн чот шарлыме жапыште черле- влакым эмлаш 11 стационарыште тӱжемат 965 койкым вераҥдыме ыле. Вара тудым шагалемдаш тӱҥальыч. Теҥгече Йошкар-Оласе эмлыме верыште эше 40 койкым кораҥдыме. Кызыт 8 стационарыште 985 койкым кодымо. Тушечын 85 процентыштыже черле- влак эмлалтыт. Советский, Оршанке районласе эмлыме вер да икымше номеран медсанчасть шкеныштын ончычсо графикышкышт пӧртылыныт, пациент- влаклан терапевт да хирургий полышым пуат, хронический инфекцийдыме чер- влакымат эмлат. Кызыт эмлыме верыште 639 пациент уло. Эмлыме верлашке кызыт шагалрак черлым кондат гынат, нелын черланыше- влак шагалын огытыл- 32 еҥ ИВЛ дене пайдалана, кислород полышым 370 пациент налеш. Коронавирус инфекций деч ӱмыр лугыч лиймаш республикыште гына огыл, моло кундемлаштат ятыр кодеш. Тӱҥ шотышто хронический шӱм черан, сакыр диабет, шодо чер, кугу нелытым погышо да коронавирус дене черланыше- влак илыш дене чеверласат. Российыш коронавирус инфекцийын у штаммже- омикрон толын шуын. Марий Элыште эше тудым регистрироватлыме огыл. Тудо икте- весе деке вашке пижшылан шотлалтеш. Тазалыкаралтыш министерстве тиде штаммым шотыш налын инфекций дене кучедалме планым ямдыла.
