Финн-угор филологий дене олимпиадым иктешлыме

           Финн-угор филологий дене Россий кӱкшытан 4-ше олимпиадын республикысе йыжыҥжым иктешлыме. 29-ше ноябрь гыч 11-ше декабрь марте Марий университетыште опорный университетым вияҥдыме Программын финн-угор шанче да туныктымо ужашыжым шыҥдарыме кышкарыште финн-угор калыкын йылмыже да сылнымутшо дене студент олимпиаде эртаралтын. Тудо онлайн- режим дене лийын. Икымше верым да икымше степенян дипломым магистратурын кокымшо курсыштыжо тунемше- влак Ольга Алексеева ден Надежда Имаева сеҥен налыныт. Тидыжат куанле: мемнан коллегына Полина Савельева, магистратурын кокымшо курсыштыжо тунемше, кумшо вер да кумшо степенян диплом дене палемдалтын. Чылаже 14 еҥлан икымше, кокымшо, кумшо вер нерген да йылме ден сылнымут деке кумылым арален кодымылан дипломым пуымо. Нуно ынде февральыште Россий кӱкшытан олимпиадыште шинчымашыштым ончыкташ тӱҥалыт.