Йошкар-Оласе у магистральыште машина йӱкым иземдыше экраным ыштыме

              Йошкар-Оласе у магистраль уремыште машина йӱкым иземдыше экраным ыштыме. Калыкле проект почеш Киров ден Строитель уремлам ушен шогышо магистральым чоҥымаште йӱкым иземдыше экран кучылталташ тӱҥалеш. Тиде авыртыш машина гӱжымӧ деч гына огыл, корно гыч шарлыше пурак да лавыра дечат арала. Кызытеш эше конструкцийын чыла блокшымат вераҥдыме огыл, ончылно паша шуко. Лач осал кидан да шонымашан вандал- влак гына чыла пудыртен ынышт пытаре ыле. Ушештарена: чоҥымо пашан кокымшо йыжыҥже тений декабрьлан мучашлалтшаш. Тиде жапыште корнын Луначарский деч Строитель урем марте ужашыжын кок меҥгеат пеле наре кужытшым, 429 метр путепроводым ыштен пытартышаш улыт. Тиде корно олан рӱдыжӧ гыч транзит транспортым лукташ да Ширяйково микрорайоным вияҥдаш полшышаш.
               Фото: П.Васильев, Марийская правда.