Йошкар-Оласе ик тӱҥ объект- Киров ден Строитель уремлам ушен шогышо корно- Марий Эл кучемын шинчаончылныжо

                 Йошкар-Оласе ик тӱҥ объект- Киров ден Строитель уремлам ушен шогышо корно- Марий Эл кучемын шинчаончылныжо улеш. Марий Элым вуйлатыше Александр Евстифеев корно магистральым чоҥымо икымше йыжыҥыште пашан кузе кайымыжым эше ик гана терген лектын. Подрядчик дене мутланымашын тӱҥ темыже паша графикым чаткан шуктымаш да ойырымо оксам жапыштыже кукчылтмаш лийын. Кызыт пеҥгыдем шинчашлан ошмам оптымо паша мучашлалтеш, мланде полотном ыштен шуктымо, мланде йымач йолын кошто икымше верым чоҥымо, кӱварын вич меҥгыжым ыштыме, ик меҥге кужыт газ пучым, 680 метр кужыт канализаций пучым, 80 метр дюкерым пужен ыштыме. Кӱварлан кӱртньӧ конструкцийым жапыштыже кондымо йодыш тӱҥ лийын. Подрядчик пашам виктарен колтен, нылымше блокым кондымо, сентябрь мучашлан кӱртньӧ конструкцийым тичмаш конден ситарат. Кызыт 204 миллион утла теҥгеаш пашам шуктымо. Тидыже тенийлан палемдымын 38 процентше лиеш. Эше ик неле йодышыжо гараж- влакым кораҥдымаш дене кылдалтын. Кызыт 231 гараж гыч 185-шым оксала налме. Магистральым вашкерак шуктымашын эше ик пайдалыкше эҥер гоч пыштыме ик эн тошто Тӱҥ кӱварым капитально олмыкташ кӱлешлык дене кылдалтеш. Проект ямде, но тудым петыраш ок лий, мучашдыме пробко лиеш. Ончыкылык паша нерген ойлымо годым палемдыме: 16-шо июльлан полотнон стабилизацийже эрта, вара июль мучаш марте тыгыде кӱ опталтеш да асфальтын тӧрлышӧ  ужашыже шаралтеш. Эше ик увер, - каласен Глава. Российысе чоҥымаш министерстве гыч министр Ирек Файзуллинын вуйлатыме кугу делегаций толшаш. Тудо объектым ончаш тӱҥалеш. Молан манаш гын, тиде кӱлешан кугыжаныш контракт.