Рыбаковмыт еш «Юл кундемын эн сай ешыже» лӱм верч кучедалеш

                 Рыбаковмыт еш «Юл кундемын эн сай ешыже» лӱм верч кучедалеш. Таче Чебоксарыште округ кӱкшытан конкурс эрта. Таҥасымашке округысо чыла кундем гыч 14 еш ушнен. Мероприятий Чуваш кугыжаныш опера да балет театрыште эрта. Марий Элын чапшым Оршанке район гыч Елена Леонидовна ден Александр Иванович Рыбаковмытын ешышт арала. Нуно 23 ий пырля илат, 11 икшывым ончен куштат: нылытше шкеныштын, 7-ше ашнаш налме. Елена Леонидовна- озавате: крючок дене пидаш йӧрата, пеледышым ончен кушта, вольыкым ашна, тӱрлӧ сӧрал ӱзгарым ыштылеш, кол кучаш, туризмым, спортым йӧрата. Александр Иванович Оршанкысе педколледжын физкультура пӧлкажым тунем пытарен, но кызыт чоҥышылан тырша. Пӧртыштымат тудо шке кидше дене  чоҥен шынден. Кугу сурт-озанлыкышт, вольыкышт, сурт-кайыкышт, эсогыл кол ден черепахыштат  уло. 2019-ше ийыште нуно республикысе конкурсышто кокымшо верым налыныт ыле.
Фото: https://www.marimedia.ru/