Марий Элым вуйлатыше Александр Евстифеев паша дене Йошкар-Ола мучко коштын савырнен

                Марий Элым вуйлатыше Александр Евстифеев паша дене Йошкар-Ола мучко коштын савырнен. Тудо корным ачалыме пашам, «Кинде-шинчал» скульптурым уэмдымым ончен. Тиде скульптурым олашке Шернур корно велым пурымаште лач 50 ий ончыч ыштыме улмаш. Тиде жапыште тудым олмыктымо огыл. Объектым озадымылан шотлымо. Сандене 2013-шо ийыште тудым ола администраций шке ӱмбакыже налын. Чапкӱн лӱмгечыжлан тудым олымкташ кутырен келшыме. Мэр Евгений Масловын мутшо почеш, 15-ше июль марте специалист- влак орнаментым тӧрлат, тӧргалтше ужашыжым уэш ыштат, молыжым терген лектыт, ешарен пеҥгыдемдат, орнаментым йошкар тӱс дене чиялташ лийме. Республикым вуйлатыше олаш пурымо кумдыкым тӱзландарымым пеш чынлан шотлен. Корным тӧрлымӧ, а шолдыргышо чапкӱ вожылмашке шуктен кертеш ыле. Тыге лийшаш огыл, манын тудо. Транспорт да корно озанлык министр Александр Герасименко тыге каласен: Шернур корно гыч пурымо ик меҥге кужыт корно ужашымат олмыктымо. Тендан кӱштымӧ почеш, Олалан 50 миллион теҥгем ойырымо ыле. Тиде шийвундо дене олаш пурымо ужашым Санчурск, Шернур корнышто ачалыме, тыгак Серов, Медицина, Подольскысо Курсант- влак уремым тӧрлымӧ. Республикым вуйлатышылан тыгак у корно техникым- эрыктыше «Фаун» машинам ончыктымо. Тудым  главан кӱштымыж почеш налме. Кызыт «Бродвей» машина кучылталтеш, но тудо морально тоштемын. А немыч установка арулыкым 95 процентлан чатканрак шукта. Александр Евстифеевын мутшо почеш, корным чоҥаш гына огыл, тудым эше арун кучаш кӱлеш. Машина яра шогышаш огыл, ола яндар лийшаш, - каласен мэрлан Республикым вуйлатыше.