Йошкар-Олан аэропортшылан Эшпайын лӱмжым пуэн кертыт

Йошкар-Олан аэропортшылан Эшпайын лӱмжым пуэн кертыт. Оласе инициативный группа аэропортлан композитор Андрей Эшпайын лӱмжым пуаш темлен. Андрей Эшпай симфоний, оперетта, балет, оркестр- влаклан концерт, муро да романс- влакын авторышт семын палыме. Тудын ӱмыржӧ 2015-ше ийыште кӱрылтын. Оласе калыкын тӱҥалтышыжым ноябрь кыдалне лийшаш тӱшка мер колыштмаште каҥашен кертыт, увертара Марий Элысе мер палатым вуйлатыше Герман Дементьевлан эҥертен, «Марийская правда» газет. Тӱҥалтышым сайлан шотлат гын, тудо Российын Общественный палатышкыже кая, а тудыжо Россий правительствылан темлымашым ямдыла.