«Шойбулакский» племзавод визымше сӧсна комплексым почын

 Республикыштына йӧнан инвестиций климат да кугыжаныш полышлан кӧра вӱдышо ял озанлык предприятий производствыжым кумдаҥда. Теҥгече Оршанке районысо Овечкин ялыште «Йола» кугу агрохолдингыш пурышо  «Шойбулакский» племзавод визымше сӧсна комплексым почын. Торжественный церемонийыште Марий Элым вуйлатыше Александр Евстифеев лийын. Тудо «Шойбулакскийын вице-президентше Имран Цинпаев дене производство кумдыкым ончен лектын. Кугыжаныш полышым республикым вияҥдыме индивидуальный программе кышкарыште пуымо. Сӧсна комплексым тӱжемат 250 авасӧсналан келыштарыме. Тушто талукышто 45 тӱжем вуй сӧснам пукшен ӧрдыктарышаш улыт, вич тӱжем тонн шылым ыштен налаш палемдыме. Тыге 28 пашаверым ыштыме. 900 миллион теҥге инвестицийым пыштыме. Вице-президентын мутшо почеш, «Шойбулакский» племзаводым Российысе пырче урлыкым ыштен налше озанлык- влакын реестрышкышт пуртымо, а республикыште тудо 20 процент пырчым ыштен налеш. У комплексым пашаш колтымо дене эше тӱжемат 700 гектар кумдык мландым ешарен кучылташ шонат. Предприятий икмыняр муниципал образованийыште пашам ышта- Советский, Медведево да Оршанке районлаште. Сатужым Российысе 70  регионыш колта, 350 тӱрлӧ продукцийым луктеш. Чылаже тӱжемат 278 еҥ пашам ышта.