Вич еҥ ондалкалыше- влакын кидышкышт логалын

Вич еҥ ондалкалыше- влакын кидышкышт логалын. Республикысе МВД-ште ончычсо семынак ондалалтше- влакым регистрироватлат. Тиде- интернетыште ондалкалыме нерген ойлалтеш. Теве, Марий Турек район гыч 39 ияш пӧръеҥ Авито сайт гоч 100 тӱжем теҥгелан грузовой автомобильым налнеже улмаш. Ончылгоч 50 тӱжем теҥгем тӱлен да Пермь крайыш машинажым налаш каен. Верыш миен шумеке ужалыше еҥ дене кыл йомын. Тыге ондалалтмыжым умылен. Козьмодемьянск гыч 32 ияш поръеҥ машинажлан кок омсам налнеже улмаш да 20 тӱжем теҥгем кусарен. Йошкар-Ола гыч ӱдыр электрон книгам ужалаш шонен да ныл тӱжемым йомдарен, 25 ияш рвезе телевизорым ужалаш лийын да счётшо гыч 131 тӱжем теҥге мучыштен. Рӱдӧ ола гыч 62 ияш ӱдырамаш норко упш ден пластиным заказатлен, а тудлан тыглай шке пидме упшым колтеныт. Чылаже шотыштат уголовный пашам тарватыме.