Йошкар-Ола гыч шыгыр маршрутко- влак йомын кертыт

               Тений Йошкар-Ола гыч шыгыр маршрутко- влак йомын кертыт. Молан манаш гын, рӱдӧ олан маршрут сетьшым оптимизаций вуча. Изи маршрутко- влакым кокла кугытан автобус- влак дене вашталташ палемдыме. Пассажирым шупшыктымаш республикылан ик эн кӱлешан да ончылно шогышо йодыш улеш. Олаште коштшо маршрутко-влак путырак шыгыр улыт, эр-кас тушто пассажирлан вер ок сите. Тений идалык мучко транспорт министерстве олан тӱшка транспортшым саемдаш шона. Тӱҥ транспортлан троллейбус ден кокла классан автобус- влак шотлалташ тӱҥалыт. Чыла транспорт кугжынышын эскерымыже почеш единый расписаний дене кошташ тӱҥалеш. Тыге корнышто икте- весым эртен каяш тӧчен кудалыштмаш пытышаш.