Таче- Российысе печать кече

               Таче республикысе журналист- влак шке пайремыштым палемдат- Российысе печать кечым. Марий Элыштына 100 утла тӱшка увер средствым, 10 сеть савыктышым, кум телеканалым, 10 радиоканалым регистрироватлыме. Поро йӱла почеш, 13-шо чатлама кечын ончыл журналист- влак республикым вуйлатыше дене вашлийыныт.  Александр Евстифеев журналист- влакым сулен налме наградышт дене саламлен. Республикын эн кӱкшӧ наградыжым- «Марий Элын Шӧртньӧ перожым» 2021-ше ийын лектышыже почеш мемнан коллегына, «Марий Эл» ГТРК-ан корреспондентше, «Вести Марий Эл» увер программым вӱдышӧ Вера Чистова сулен налын. Тиддеч посна правительствын пермийжым таче  тыгак мемнан эше ик коллегына, тематический программын кугурак редакторжо Анна Лобанова, «Шернур вел» газетын корреспондентше Алевтина Вшивцева, вес марий радион редакторжо Марина Глушкова, «Кугарня» газет гыч корреспондент Надежда Моисеева да молат налыныт. Вара республикысе журналист- влак Яков Эшпай лӱмеш марий кугыжаныш филармонийыш пайрем погынымашыш чумыргеныт.