Чодырам шолып руышо- влаклан 13 миллион теҥгем тӱлыктымӧ

               Кодшо ийын республикыштына чодырам шолып руышо- влак деч 13 миллион утла теҥге оксам кӱрын лукмо. Марий Элыште 2021-ше ий мучко пушеҥгым шолыштмо дене кылдалтше 50 осал пашам регистрироватлыме. Тидыже 2020-шо ий деч 9 процентлан шагалрак. Тидын годым тӱшкан ыштыме кугу осал паша 49 процент гыч 44 процент марте шагалемын. Тыгай осал пашам почмашат ешаралтын. 2020-шо ийыште 66 процент лийын гын, эртыше ийын 77 процентым эртен. Эҥгекым пӧртылтымашат кушкын. Прокуратурын ончыктымыжо почеш, 2021-ше ийыште 12 миллионат 136 тӱжем утла теҥгеаш эҥгекым ыштыме. Полшышо мерым шотыш налын, 13 миллионат 56 тӱжем утла теҥгем пӧртылтымӧ. 2020-шо ийыште эҥгекым 23 миллионат 500 утла тӱжем тенгем рашемдыме ыле гын, кум миллионат 600 тӱжем теҥгем гына пӧртылтымӧ ыле.