Визымйар посёлкысо школым капитально олмыктымо деч вара Марий Элым вуйлатыше ончен лектын

              Марий Элым вуйлатыше Килемар районысо Визымйар посёлкысо школым капитально олмыктымо деч вара ончен лектын. Визымйар кыдалаш школым 1978-ше ийыште чоҥымо. У тунемме ий тӱналме вашеш тудым капитально олмыктымо. Тиде пашалан 25 миллион утла теҥге оксам кучылтмо. Ынде школ йӧршеш вашталтын. Леведышым, пырдыжым, актовый да спортзаллам, пищеблок ден кабинетлам ачалыме, окам, инженер коммуникацийым вашталтыме. Лишыл жапыште  у мебельым кондышаш улыт, «Точка роста» рӱдер почылтын. Республикым вуйлатыше шуктымо пашам аклен лектын. Тӧнеж 600 йочалан келыштаралтын. Тиде посёлкылан  пеш ситыше. Но тений йоча шагалрак толын. Ачалыме пашам чаплын шуктымо. Тидымат ешарен: республикысе чыла школымат шотыш кондыман, тиде пашаште аныклаш ок кӱл, манын тудо. Кызыт школышто 200 йоча шинчымашым пога, икымше классыш 23 икшыве толын, шушаш ийын 11 классым 8 ӱдыр-рвезе тунем лектеш.