Элнет ялыште храм уэмеш
Республикысе ик эн тошто храмым олмыкташ 30 миллион утла теҥге оксам ойырымо. Параньга районысо Элнет ялысе черкыште олмыктымо паша кая. Шнуй Юмынаван Покро храмже тӱвыра поянлык объектлан шотлалтеш. Тудым 1887-ше ийыште чоҥымо. Тудо шке жапыштыже республикысе ик эн кугу черкылан шотлалтын. Совет жапыште тудо палынак шолдырген, ужашлажым пудыртымо. Районысо кучем полшымо дене верысе калык зданийым тӧрлаш тӱҥалын. Но умбакыже тудым профессионал реставратор- влак ыштышаш улыт. Пужен ыштыме пашам республикым вуйлатыше шке контрольыштыжо куча. Тений да шушаш ийын 30 миллионат 500 тӱжем теҥгеаш пашам шуктышаш улыт.