У илыме верым ыштен шуктымо дене Марий Эл «ужар зоныш» пура

У илыме верым  ыштен шуктымо дене Марий Эл «ужар зоныш» пура. Тидын нерген Юл кундем округысо кундемлам вуйлатыше- влак дене Россий Правительстве председательын алмаштышыже Марат Хуснуллин совещанийым эртарымыж годым каласен. Погынымаш округысо регион- влакым социально-экономически вияҥдыме йодышлан пӧлеклалтын. Тушто Марий Элым вуйлатыше Александр Евстифееват участвоватлен. Совещанийыште «Илыме вер да оласе кумдык», «Лӱдыкшыдымӧ да сай качестван автомобиль корно- влак» калыкле проект-влакым шыҥдарыме да илаш йӧрыдымӧ пӧртла гыч калыкым кусарыме программе нерген ойлымо. Марат Хуснуллин палемден: регионласе кучем- влакын пашашт светофор семын аклалтеш. Ужар зонышто ончылно кайыше- влак, йошкаргыште- почеш кодшо шамыч, сарыште- кокла показателян кундем-влак улыт. Округышто корно дене кылдалтше проект эн кӱкшӧ лектышым ончыкта. Оксам кучылтмо шот дене 55 процентым эртен, Россий мучко 48 процент. Корно пашам шуктымо дене 71 процент, элна мучко- 67 процент. Илыме верым чоҥымо шотыштат округ ончылно улеш. Округысо 8 регион ужар зоныш пура. Нунын коклаште Марий Элнат уло. Тений тошто пӧртла гыч 234 еҥым кусарыме, идалык мучаш марте эше 514 еҥым кусараш палемдыме.