Кугыжаныш Погынын депутатше- влак калыкым транспорт дене обслуживатлыме пашам виктарыме нерген йодышым онченыт
Марий Эл Кугыжаныш Погынын депутатше- влак калыкым транспорт дене обслуживатлыме пашам виктарыме нерген йодышым онченыт. Докладым республикысе транспорт да корно озанлык министр Александр Герасименко ыштен. Тудо каласен: кызыт межмуниципал маршрутын реестрже почеш 130 маршрут дене калыкым шупшыктат. Калыкым да багажым легковой такси дене шупшыктымаште тенийсе икымше пелийыште 298 разрешенийым пуымо. Калыкым обслуживатлыме пашам саемдыме шотышто мера- влак шукталтыт. Республикыштына транспорт чарныме вер- влакын перечньыштым ыштыме, у реестрым ыштыме шотышто паша шукталтеш. Йошкар-Ола администраций дене пырля рӱдӧоласе транспорт системым виктарыме полномочийым транспорт министерствылан кусарыме шотышто паша шукталтеш. Район- влак коклаште транспорт коштмым саемдаш манын, кызыт Йошкар-Олаште у автовокзалым чоҥымо йодыш виктаралтеш, малнде участкым палемдыме. Министр Йошкар-Ола аэропорт нергенат ойлен. Тудын пашам ышташ тӱҥалмекыже индеш тӱжемат 300 наре еҥым шупшыктымо. Кызыт Москошко кажне рейсыш кокла шот дене 21 еҥ, Санкт-Петербургыш 33 еҥ чоҥештылеш. Аэропортын у терминалжым чоҥаш кутырен келшыме паша шукталтеш, оксам федерал бюджет ойырышаш. Министр тыгак погынышо- влакын йодышыштлан вашештен.
