Республикым социально- экономически вияҥдыме лектышым каҥашыме
Правительстве пӧртыштӧ Марий Элым вуйлатыше Александр Евстифеевын эртарыме заседанийыштыже тенийсе икымше пелийлан республикым социально- экономически вияҥдыме лектышым да консолидированный бюджетым шуктымо да шыже –теле жаплан ямдылалтме йодышым каҥашыме. Промышленность министр Станислав Крыловын мутшо почеш производствын кушмашыже эмым лукмаште (137 наре процент), электрооборудованийым (117%), пластмасс сатум (116%), химический веществам (115%), автотранспорт, прицеп ден полуприцепым (111%), кочкыш сатум лукмаште (103%) палдырна. Икымше пелийыште ял озанлык сатум 104 процентым лукмо. Икымше пелийыште кок тӱжем пачерым чоҥымо, илыме верым 143 тӱжем квадрат метрым ыштыме. Тидыже 134 процент лиеш. Финанс министр Алексей Торощинын мутшо почеш, консолидированный бюджетын парыш ужашыжым 18 утла миллиард теҥгелан ушктымо. Тидыже талукаш планын 42 процентше лиеш. Кодшо ий дене таҥастарымаште тудо кок миллиардат 600 миллион теҥгелан ешаралтын. Парышым кугемдаш тений пандемий чаракым ыштен манын палемдыме. Александр Евстифеев палемден: целевой показатель дене келшышын, темлымаш лийын гынат, ме кредит корно дене ышна кай. Изин гынат кугыжаныш парымым шагалемден толына. Телылан ямдылалтме йодыш нерген чоҥымаш да ЖКХ министр Михаил Степанов ойлен. Тудын мутшо почеш. Шуко пачеран пӧрт, котельный, шокшо вӱд, канадизаций, электросетьын кугурак ужашыжым ямдылен шуктымо. Вучыдымо экшыклан аварий да олмыктышо бригадым, кӱлеш техникым ямдылыме.
