Туныктышо- влак вакцинацийым эртат

                   Республикысе 54 утла процент педагог коронавирус деч аралтышым ыштыктен. Правительстве пӧртыштӧ туныктышо- влакым вакцинироватлыме да у тунемме ийлан ямдылалтме йодышым каҥашыме. Марий Элым вуйлатыше Александр Евстифеев дене вашлиймаште туныктыш министрын алмаштышыже Нонна Антоничева увертарен: тымарте 54 тичмашат 3 луаш процент туныктышо прививкым ыштыктен. Прививке кампаний чыла пашаче коллекивыштат кая. 25-ше август марте 60 процент деч шагал огыл туныктышо вакцинацийым эртышаш. У тунемме ийлан ямдылалтме нерген        ойлаш гын, министрын алмаштышыже увертарен: икымше сентябрьыште 250 тунемме тӧнеж омсажым почеш. Тушечын нылытше кастене тунемме школ. Чылаже 83 тӱжемат пеле ӱдыр-рвезе парт коклаш шинчеш. Тушечын 9 тӱжемат 900-ыжӧ икымше классыш толеш. 218 школышто ик смене дене, 32 школышто кок смене дене тунемаш тӱҥалыт. 150 самырык туныктышо пашаш ушна, 12 педагог «Земский учитель» программе почеш ышташ тӱҥалеш. Кызыт 27 школ капитально олмыкталтеш, кок у школ чоҥалтеш. Тыгак 2022-шо ийыште «Юбилейный» микрорайонышто, 2024-ше ийыште «Восточный» микрорайонышто чоҥаш палемдыме. Чыла школ шокшо кочкыш дене пукшаш ямде. Тӱҥалтыш класслаште тунемше 37 тӱжем утла йоча шокшо кочкышым яра налеш.