Вакцинаций шотышто ондалымаш лийын огыл

                  Республикыштына вакцинацийым ыштыме нерген шоя сертификатым возымо осал пашам регистрироватлыме огыл. Тиде пашам кучем ден правам аралыше орган- влак контрольышто кучат. Тачысе кечылан мемнан кундемыште вакцинаций шотышто, туддеч кораҥаш лийме нерген шоя сертификатым возыктымо, антителан, кюар кодын да моло документын улмыжо нерген ӧрдыж документым кучылтын ондалаш тӧчымашым палемдыме огыл. Тыгай документым возгален пуышо врач- влак нергенат увер пурен огыл. Тидын нерген элкӧргӧ паша министр Сергей Волчков Марий Элым вуйлатышын эртарыме оперативный штабын заседанийыштыже ойлен. Интернетысе увер да телекоммуникаций сетьым тиде йодыш дене эре мониторитлен шогат. Молан манаш гын, тыгай темлымашлан уголовно да админстративно мутым кучаш шогалтен кертыт. Таче кечылан вакцинаций шотышто шоя документым пуаш темлыше 8 интернет- ресурсым рашемдыме. Нуным Роскомнадзор петырен. Чыла сайтшынат озаже йот эллаште улыт. Тыгак мониторинг годым «вакцинаций сайыш ок шукто» манын шоя уверым вераҥдымым рашемдыме. Мутлан, Волжск гыч ӱдырамаш социал сетьыште «вакцинаций колымашке шукта» манын уверым вераҥден. Тудын шотышто административный протоколым возымо. Кодшо кечылаште тыгаяк уверым Йошкар-Олаште рашемдыме. Кызыт тергымаш кая. Рашемдыме дене пырля профилактике паша эртаралтеш. Пандемий тӱҥалме годсек «шокшо» телефон линий пашам ышта.