Эрла- самырык тукымын Тӱнямбал кечыже

                  Республикыштына илыше уло калыкын ик чырыкше наре самырык- влак улыт. Самырык- влакын тӱнямбал кечышт идалык еда 12-шо августышто палемдалтеш. Тиде пайремым ООН-ын генеральный ассамблейже 1999-ше ийыште пеҥгыдемден. Российыште, законодательстве дене келшышын, самырыклан 14 гыч 35 ияш марте еҥ- влак шотлалтыт. Марий Элыште тений идалык тӱҥалтышлан тиде категорийыш пурышо- влак 178 тӱжем утла лийыныт. А тидыже уло калыкын 26 утла процентше лиеш. Тӱнямбалне ятыр самырык еҥ ончылно шогышо тӱҥ задачылан келшыше шинчымашым налмаш да пашаверым мумаш шотлалтеш. Южо еҥже шинчымашым налаш йот эллашкат кая. Теве кодшо ийын республикысе вузлаште йот эл гыч кок тӱжемат 650 еҥ тунемын.