Волжскысо ечероллер трассе икымше таҥасымашым эртарен

                  Республикыштына Юл кундем гыч 150 утла спортсмен ече роллер дене таҥасымаште сеҥышаш верч кучедалын. Волжск олаште ечероллер дене Физкультурникын кечыжлан пӧлеклалтше первенство эртен. Тушто республикын да пошкудо кундемла гыч 150 спортсмен моштымашыжым ончыктен. Правительствын полшымыж дене Волжскыште ыштыме трассыште тиде икымше таҥасымаш. Ечероллер але роликан ече- ечызе- влаклан шокшо жапыште у теле тургымлан ямдылалташ сай йӧн. Волжск олаште первенствым ече дене мунчалтыме федераций ямдылен. Спортсмен- влак республикысе ола да районла, Татарстан, Коми, Чуваший да Киров область гыч лийыныт. Таҥасымаш ийгот шот дене икмыняр тӱшкаште эртен. Эн изи- влаклан 12 ий веле темын гын, ветеран- влак 1956-шо ийыште шочшо да кугурак ийготан лийыныт. Марий спортсмен-влак сай лектышым ончыктеныт. Шке ийгот категорийыштышт Красногорский гыч Екатерина Скворцова, Волжск гыч Владимир Рогозин сеҥышыш лектыныт. Кокымшо верым Дмитрий Чекулаев, Волжск гыч Елизавета Андреянова, Данил ден Илья Петуховмыт, Николай Малышев, Александр Макматов Йошкар-Ола гыч налыныт. Той медальым Волжский район гыч Карина Егорова, Козьмодемьянск гыч Макар Волков, Йошкар-Ола гыч Сергей Лебедевлан кучыктымо. Ятыр тренерын палемдымыж почеш, трассе республикыште ече спортым вияҥдаш сай шӱкалтышым пуа. Тыгай трассе кызытеш пошкудо кундемлаштат уке.
               Фотом "ВК" вот гыч налме.