Эше ик тӱшка Спутник лайт вакциным кондымо

                     Республикыш эше ик тӱшка Спутник лайт вакциным кондымо. Тиде гана лу тӱжемат 500 дозо толын. Тудым чыла поликлинике коклаште шеледыме. Лишыл жапыште эше ик тӱшкам кондышаш улыт. Тымарте Марий Элыш 151 тӱжемат 420 комплект вакциным кондымо. 134 тӱжемат 300 утла еҥ прививкым ыштыктен. Нунын кокла гыч 108 тӱжем утла еҥже тичмаш курсым эртен. Йошкар-Олаште Сеҥымашын кумлымшо идалыкше лӱмеш тӱвыра полатыште вакцинаций рӱдер пашам ышта. Паша кечылаште 10 гыч 20 шагат марте, каныш кечылаште 10 гыч 15 шагат марте мияш лиеш. Коронавирус инфекций дене ситуаций эше неле кодеш. Лу стационарыште 1435 койко уло. Тушечын 80 процентыштыже эмлалтыт. Кече еда 100 наре еҥым эмлаш пыштат, ИВЛ дене 50 утла еҥ пайдалана.