Теле мучко олаште мыняр шӱкшак погына?

            Оласе уремлашке телыгоч мыняр шӱк-куштырам луктын кудалтат? Тенийсе шошо мотор кечыже дене эше пеш ок куандаре, мӧҥгешла лум ден йӱрым гына темла. Апрельын кум кечыштыже гына нормын 34 процент вӱдыжгыжӧ возын. Игечын койышыжым ончыде «Город» МУП-ын кундемжым эрыктыше- влак куд шагат эр гычак ола уремлаште улыт. Лум шулен пытен огыл гынат кече еда нуно корно воктелсе газонла гыч пел тонн дене шӱк-куштырам погат. Утларакше кленча, пакет, кочкышым вӱдылмӧ да кампет кагаз- влак логалыт. 28-ше мартыште уремлам эрыктыме шошымсо месячник тӱҥалын. А 8-ше, 15-ше да 22-шо апрельыште оласе тӱшка субботник- влакым эртараш палемдыме. Тиде жапыште кодшо ийын кок тӱжемат 300 утла тонн лавыра ден 688 тонн ӱштын чумырымо куштырам ола деч ӧрдыжкӧ шупшыктымо, тӱшка кумдыкла гыч 38 тӱжем кубометр шӱкшакым поген лукмо. Тидымат ушештарыман: организаций, предприятий, кевыт да моло тӧнеж- влак шке воктелсе кундемыштым эрыктен тӱзландарен шындышаш улыт.