Аэропортын у терминалжым чоҥаш подрядчикым рашемдат
Йошкар-Олаште аэропортын у терминалжым чоҥаш подрядчикым рашемдат. Кугыжаныш закупко сайтыште электрон аукционым эртарыме нерген уверым савыктыме. Заказчикше: Республикысе транспорт да корно озанлык министерстве. Тӱҥалтыш акше ик миллардат 456 миллион да 493 тӱжем теҥге. Йодмашым 7-ше апрель марте налыт. Изиш ондакырак увертарыме ыле: аэровокзалын у зданийжым чоҥымаш шагатыште 400 наре пассажирым обслуживатлаш полша. Чоҥашлан ик миллиардат пеле теҥге кайышаш, а инфраструктура бюджет кредит кӱшеш 643 миллион теҥге ойыралтеш. Икымше мартлан шотлымаште тений идалык тӱналтыш гыч Йошкар-Ола аэропорт гоч кум тӱжемат 700 утла еҥ чоҥештен Кодшо ийын тыгай жаплан кок тӱжемат 300 еҥ ыле. Калык утларакше Москош чоҥештылын. 2020-шо ий гыч Санкт-Петербургыш корно почылтын, географийым эше Сочи кумдаҥден. Тений Йошкар-Ола гыч Симферопольыш самолётым колташ шонат.
