Марий Эл гыч кок волонтёр Владимир Путин деч медальым налын

              Марий Эл гыч кок волонтёр Владимир Путин деч медальым налын. «Пиалан билет» отрядын волонтёржо- влак Волжск гыч Дарья Пупкина ден Ярослав Егоровлан «Ме пырля» Россий кӱкшытан вашполыш акцийым ямдылымашке надырым пыштымылан» шарнымашан медальым кучыктымо. Награда деке Грамотеш шке кидпалыжым Российын Президентше Владимир Путин шынден. Самырык политике, спорт да туризм министерстве коллегийын заседанийыштыже волонтёр- влаклан наградым Правительство вуйлатышын икымше алмаштышыже, Республикым вуйлатыше пеленысе добровольчествым вияҥдыме шотышто Советын председательже Михаил Васютин кучыктен. Волжскысо 4-ше школын директоржо, «Пиалан билет» волонтёр ортядым вуйлатыше Марина Яновская инвалидностян йоча- влак дене пашам ыштыше социал кӱлешан проект- влакым шыҥдарымылан да добровольчествым вияҥдымашке надырым пыштымыжлан министерствын тауштымашыже дене палемдалтын. Ушештарена: кодшо ийын Премийлан 25 тӱжем йодмашым пуымо лийын. Тушечын 180-жо - Марий Эл гыч. Республике гыч 21 еҥже полуфиналыш лектын, нылытше- финалыш.
           Фото: Спорт-туризм министерстве. Марийская правда.