ЖКХ-лан тариф план почеш кугемеш

               Российын чоҥымаш министерствыжын увертарымыже почеш ЖКХ-лан тарифым палемдыме деч утыжым кӱзыкташ ок тӱҥал. Идалык еда икымше июльышто индексироватлыме деч вара ешартыш кугеммаш ок лий, - каласен Российын чоҥымаш да ЖКХ министрже Ирек Файзуллин. Правительстве ончылно тарифым кугемдаш задаче ок шого. РБК-н увертарымыже почеш кажне ийын икымше июльышто ЖКУ-лан тариф индексироватлалтеш. Тудо кокла шот дене 4 процентлан кугемеш, но тӱрлӧ кундемыште ойыртемалтеш. 2022-шо ийлан индексацийын показательже кодшо ийын ноябрьыште пеҥгыдемдалтын. Правительствын пунчалже почеш эн изи показательым Свердлов областьыште- 2,9 процент, Марий Элыште- 3.3, Чуктотка автоном округышто- 3,3 процентым палемдыме, эн кугу Чечняште- 6,5, Санкт-Петербургышто- 6,3, Севастопольыште, Крымыште да Татарстаныште- 6,2 процентлан кугемшаш.