Йошкар-Олаште динозаврым ончаш лиеш

            Йошкар-Олаш акрет жапысе янлык- влакын ойыртемалтше палеонтологий выставкым кондат. «Акрет годсо илыш» у ончер Вяткысе палеонтологий тоштер гыч толеш. Тудым апрельыште Евсеев лӱмеш калыкле тоштерыште ончаш лиеш. Вич шӱдӧ миллион наре ий кужытым авалтыше 50 наре экспонатым калык ончыко луктыт. Экспозиций планетыште илышын кузе иланымыже, вияҥын толмыжо, динозавр- влакын колен пытымешкышт янлык тӱҥян ешаралтмыже нерген каласкала. Эн кугу ӱзгарлан тиранозавр ден трицератопсын ик метрат 20 сантиметр кужытан вуйкоҥырашт улыт. Тыгак археоптериксын, чоҥештылше шыҥшальын, теҥыз шыҥшальын лулегыштым, динозавр- влакын пӱкташ пыштыме муныштым да моло оҥайым ужаш лиеш.
           Фото: Вяткысе палеонтологий тоштер. МариМедиа.