Лӱльпан йоча пӧрт гыч футболист- влак Сочиш каят

               Лӱльпан йоча пӧрт гыч футболист- влак Россий кӱкшытан таҥасымашын финалышкыже лектыныт. Нуно Юл кундем округысо турнирын чемпионжо семын Сочи олашке йоча пӧрт да интернат-школлан командышт коклаште «Ончыкылык тый дечет шога» таҥасымашын финалышкыже каят. Сеҥыше- влаклан тӱҥ приз семын тӱнясе ик вӱдышӧ клубын футбол академийыштыже тунеммаш лиеш. Лӱльпан рӱдер гыч рвезе- влак Озаҥ олаште 24-25-ше мартыште эртыше округысо йыжыҥын сеҥышыже лийыныт ыле. Спорт Сити футбол манежыште 11-15 ияш спортсмен- влакын эн виян 14 командышт погынен ыле. 130 утла йоча кок ийгот категорийыште таҥасен. Изирак- влакын группыштышт Лӱльпан гыч «Марс» команде пытартыш минутышто голым еҥ капкаште пуртен да Саратов областьысе Пугачёв ола гыч  «Интер-2» команде деч сеҥымашым шупшын налын манаш лиеш. Кумшо верыш Оренбург гыч спортсмен- влак лектыныт. Сборныйын тренерже Виктор Дмитриевын мутшо почеш рвезе- влак кажне кечын ямдылалтыныт. Сочишке нуно икымше гана каят.
           Фото: Мегафонын пресс-службыжо