Марий Элым вуйлатыше Йошкар-Олаште Правосудий Пӧртлан ик зданийым муаш кӱштен

             Марий Элым вуйлатыше Йошкар-Олаште Правосудий Пӧртлан пашам ышташ келшыше ик зданийым муаш кӱштен. Александр Евстифеев Республикын Верховный судшым вуйлатыше Артём Грачёв дене пашаче вашлиймашым эртарен. Ончымо йодыш- влак коклаште мировой судья- влаклан калыкын праважым, эрыкшым, законло интересшым аралаш виктаралтше пашам шукташ, тыгак суд участке- влакым ик пӧлемыште вераҥдыме мероприятий- влакым эртараш келшышые йӧным ыштымаш лийын. Мировой юстицийын нагрузкыжо кугем толеш. Судья- влак пеш кугу пашам шуктат. Сандене мировой судья- влак чотыштат келшен толшо лийшаш.
               Республикысе Верховный судым вуйлатыше Артём Грачёват Йошкар-Ола ден Медведево районышто калыкын чотшо шукем толмо нерген ойлен. Сандене южо районышто участкым шагалемден, Йошкар-Ола ден Медведево районлан пуаш кӱлеш манын. Медведево районышто аппарат ден суд заседаний заллан у помещений кӱлеш лиеш. Тыге Медведевысе 41-ше участкын пашаеҥ чотшо Курык марий районышто шагалемдымылан кӧра ешаралтшаш.
              Тыгаяк паша Йошкар-Олаштат ышталтшаш. Шернур суд районышто ик участке шагалемеш да Йошкар-Олаш 42-шо суд участке кусаралтеш. Рӱдӧ олаште кызыт мировой судья- влак кум верыште верланеныт. Сандене нуным чылаштым ик помещенийыш вераҥдаш темлыме. Тидыже судья- влакланат, калыкланат йӧнан лиеш ыле. Сандене республикым вуйлатыше мировой судья- влаклан пашам ышташ ик зданийым муаш темлен.
             Фото: Марий Элым вуйлатышын организаций да аналитик виктемже.