Театр сымыктышым аклыше-влаклан

Йошкар-Олаште Финн-угор театр-влакын "Майатул" фестивальышт эрта. Икымше шке спектакльжым - "Югорно" марий эпосым - Шкетан лӱмеш марий кугыжаныш драме театр жюрилан аклаш луктын. Театр сымыктышым йӧратыше-влакым фестивальым почмо дене Марий Эл вуйлатышын сомылжым жаплан шуктышо Юрий Зайцев саламлаш миен. «Тыгай фестиваль - регионын тӱвыра илышыштыже кугу событий» палемден тудо. «Мыланем Марий Эл Республикын тӱвыражым палаш оҥай. Тиде калыкын илышыже. Ончыкыжым тӱвырам вияҥдымашке мый уло вийым пышташ тӱҥалам,» - ӱшандарен Юрий Викторович. «А марий йылмым мыняр-гынат палаш манын, тудо марла лектын шогышо увер-влакым колыштам» манын палемден. Ушештарена: «Майатул» фестиваль эртыме ик арня жапыште чылаже 9 национальный театрын спектакльыштым ончаш йӧн уло.