Самырык инспектор-влак

Йошкар-Олаште «Лӱдыкшыдымылык орава» республикысе конкурс иктешлалтын. Тений икымше этап дистанционно эртен. Тушко Марий Элысе чыла район ден ола гыч самырык инспектор-влак ушненыт. Нуно корно правил-влакым да икымше медицине полышым пуымо нерген теорийым палымыштым тергеныт. Усталык конкурсымат ты гана онлайн гына эртареныт. Тений тудо ГИБДД-ын шочмыжлан 90 ий теммылан пӧлеклалтын. Чыла нине таҥасымаш-влакым иктешлен, эн виянже-влак финалыш чумыргеныт. Чылаже 7 команде. Тыште нуно самырык инспектор улмыштым практике дене пеҥгыдемденыт: автогородокышто велосипед дене кудалыштыныт, икымше медицине полышым пуэн моштымыштым ончыктеныт. Эн мастарын чылажымат Курыкмарий районысо Виловат школысо команда ыштен да икымше верыш лектын. Тудлан ынде республикынан чапшым Россий кӱкшытыштӧ аралыман.