Азам ыштыше-влаклан

Волжск олаште рӱдӧ эмлымверын азам ыштыме отделенийжым чоҥымо паша мучашке лишемеш. Тудым шыжым ыштен шуктышаш улыт. Марий Элын социал да экономике вияҥмашыже программе почеш ты проектлан 450 миллион теҥге наре окса ойыралтын. Кызыт у зданийыште кӧргӧ паша кая, йырым-йырысе кумдыкым тӱзатат. Кум пачашан у роддом кок корпус гыч шога, тудым тошто зданий деке ушымо. Ик корпусшо кӱкшӧ технологиян, тушто операцийым, азам ыштыме зал-влак, тыгак моло-влаклан лӱдыкшым луктын кертше инфекциян пациент-влаклан бокс лийыт. Вес корпусышто посна душ да шонданан 18 палате. Лишыл кум арня жапыште Йошкар-Олаштат у Перинатал рӱдер почылтшаш. Тачысе кечын тушто медицине оборудований лизенцийым эрта.