Йоча каныме тургым лишемеш

1-ше июнь гыч Йошкар-Оласе 3-шо номеран школ пелен «Самырык IT-патриот» лагерь пашам ышташ тӱҥалеш. Тушко тӱналтыш класслаште тунемше ӱдыр-рвезе-влакым чумырат. Чылаже 120 наре еҥ. Каныме деч посна нуным 3Д моделированийлан туныктат. 3-шо номеран школышто кушкын толшо тукымым шуарыме шотышто кугу паша ышталтеш. 2008-ше ий гыч тушто кадет толкын вияҥеш. Кадет ден юнармеец-влак чӱчкыдын тӱрлӧ мероприятийыш ушнат, патриот улмыштым ончыктат.